Принцот Хари и Меган Маркл ја потврдија веста дека кралот Чарлс им ја одземал кралската резиденција Фрогмор, во Виндзор, куќата на која беше нивната британска адреса.

„Можеме да ја потврдиме информацијата дека војводата и војвотката од Сасекс, беа замолени да ја напуштат својата резиденција во Фрогмор, Виндзор“, изјави нивниот портпарол за медуимите.

Омид Скоби, еден од авторите на биографијата на Хари и Меган -„Finding Freedom“, вели дека кралската одлука следела откако Хари во јануари годинава ги објави своите контроверзни мемоари. Тој тврди дека на Хари и Меган им е речено дека некој друг треба да ја добие куќата. Односите помеѓу кралското семејство и Хари никогаш не биле полоши, додава Скоби.

Како што наведуваат британските медиуми, Меган и Хари се згрозени од кралската одлука. Наводно, им е речено своите предмети од куќата да си ги земат до летото, а претходно рокот за селење им бил само две недели.