Мајката на Филип ќе донира бубрег за да се спаси животот на друго дете, a Филип ќе го добие бубрегот од мајката на тоа дете. Две мајки сплотени во борбата најдоа начин да ги спасат животите на своите деца – масовно се собираат средства за операција.
Никој подобро не може да знае како изгледа борбата за живот на децата, од мајките кои до последен миг се борат за своите најмили.
Две мајки од Македонија ќе донираат бубрези за да ги спасат животите на нивните деца, а Македонија се крева на нозе за да се соберат средства за операциите.
Преку првата крауфандинг платформа во Македонија ECrowd се собираат средства за да се спасат два млади животи.
Првиот е на Филип, момчето кое е првото дете на кое му е направена трансплантација на бубрег на Клиниката за детска хирургија во 2009-та година, кој функционирал добро сѐ до 2018-та година.
Но, оттогаш, па наваму Филип е на дијализа трипати неделно, со сериозни нарушувања на коските, зглобовите и васкуларни проблеми кои во еден момент кулминираат со сепса и коматозна состојба.
Филип се бори за живот откога знае за себе – тој не знае поинаку. Живее во количка. Но, за него е најден донор.
Мајката на Филип и мајката на друго 8-годишно дете, споени во својата борба, најдоа решение. Мајката на Филип ќе донира бубрег за да се спаси животот на 8-годишното момче, додека мајката на тоа дете, ќе донира бубрег за Филип.
Македонија повторно е на нозе, се собираат средства со кои ќе се спасат два млади животи.
Потребно е да се соберат околу 60.000 евра за Филип, за да се изврши вкрстена ретрансплантација и плазмофереза на бубрег во Турција.
