Американската актерка и водителка Џејда Пинкет Смит пред неколку дена го изненади светот со објавата дека таа и актерот Вил Смит се тајно разделени веќе седум години.
Во рамките на промоцијата на нејзината книга Worthy, таа даде интервју за People, во кое со насмевка го потврди тврдењето од нејзината автобиографија дека таа и оскаровецот не се во брак од 2016 година.
Родителите на нивните заеднички две деца – Џејден и Вилоу – оттогаш се појавуваа заедно во многу прилики и на црвениот тепих, а Џејда тврди дека сето ова време тие се разделени.
„Живееме одвоени животи, а не како маж и жена“, истакна таа.
Многумина се збунети од ова, бидејќи Вил Смит му порача на Крис Рок да не „го зема името на неговата сопруга во уста“ по сега веќе познатата шлаканица на Оскарите во 2022 година. Џејда во врска со тоа откри и нешто за што многумина се сомневаа – дека на Крис Рок со години му се допаѓа и затоа постојано ја спомнуваше неа и нејзиниот сопруг во јавноста, пренесува Глоси.
Сè уште официјалната сопруга на Вил Смит рече дека Рок еднаш ја побарал затоа што мислел дека се разведува.
Веќе некое време во Холивуд се шпекулира дека Крис Рок е тајно заљубен во Џејда Пинкет Смит за која често имал негативни коментари. Најголемиот скандал изби на Оскарите минатата година, кога комичарот ја објавуваше категоријата за најдобар документарен филм и се пошегува дека е возбуден што ја гледа Џејда Пинкет Смит како Џи Ај Џејн. Тој се пошегува со фактот дека Џејда, сопругата на Вил Смит, ја изгубила косата поради алопеција, алудирајќи на познатата филмска хероина без коса.
