Кристофер Нолан за новата хумористична серија со Ема Стоун: „Никогаш не сум видел такво нешто“

Хумористичната серија „The Curse“ пронајде нов обожавател, а тоа е режисерот номиниран за Оскар – Кристофер Нолан. Славниот режисер имал само пофални зборови за серијата со Ема Стоун и Нејтан Филдер во неодамнешното интервју за „The Playlist“.

Серијата, која беше објавена во ноември минатата година, ги следи Ашер (Филдер) и Витни Сигел (Стоун), млад брачен пар кој води реално шоу за реновирање на домот. Откако Ашер ги зема назад парите кои ѝ ги подарил на девојчето Нала за време на снимањето на емисијата, таа фрла клетва на младиот пар која им го нарушува животот.

„The Curse“ е сатирична црна комедија, создадена од Бени Сафди и Нејтан Филдер, која на досега невиден начин ги обработува темите на привилегираност, лажниот алтруизам и филантропијата.

Нолан во интервјуто изјавил дека е воодушевен од серијата и дека никогаш не знаете што ќе се случи понатаму, дури и кога мислите дека знаете што следува.

„Ова е неверојатна серија и никогаш не сум видел нешто слично на телевизија“, рече режисерот. „Има многу малку серии кои излегуваат, а да немаат претходници“.

Нолан потоа додал дека повеќето серии влечат инспирации од класици како „Twin Peaks“, „The Prisoner“ и „Singing Detective“, но „The Curse“ се истакнува по тоа што не може да се спореди со ниту една друга серија.

Првите пет епизоди од серијата „The Curse“ моментално се достапни на стриминг сервисот „SkyShowtime“. Последните пет епизоди ќе бидат достапни од 16-ти февруари.