Ник Кирјос полека става крај на голготата и се враќа на тенисот после две години, период во кој најмногу се истакна како коментатор, но и спаринг партнер на Новак Ѓоковиќ.
Австралиецот открива дека морал да направи тајна операција на зглобот за да ги реши хроничните проблеми кои го прогонувале долго време, а открива дека токму српскиот тенисер е главен виновник за негово враќање на терените.
Кариерата на Ник сериозно беше доведена во прашњае по долгата пауза која ја направи, а откако најави враќање на терените веќе во декември, планира да биде максимално подготовен за тенискиот грен слем во неговата родна земја (Австралија).
– Изминатово лето тренирав со Новак на Вимблдон и тој ми порача дека воопшто не изгледам како тенисер кој правел операција. Тоа за мене беше голем мотив, тогаш сфатив дека можам да направам кам-бек на теренот. Јас не бев свесен за тоа, се додека тоа не ми беше кажано од Ноле.
– Неговите зборови беа голем потстрек за мене и тој е виновник за моето враќање. Да не беше Ноле, не знам дали ќе бев толку мотивиран за враќање на теренот. Беше голема работа што тие зборови ги слушнав од него, – открива Кирјос, а во продолжение обелоденува детали и за својата операција на зглобот на раката.
– Морав да направам реконструкција на зглобот на раката. Во раката ми беа направени четири дупки и некоја жица го држеше мојот зглоб исправен. Прстите ми изгледаа како колбасици после операцијата, бев во гипс 12 недели и воопшто не го движев зглобот. Практично, морав одново да ги учам сите движења со зглобот, – открива Ник.
