Австралиско-кинескиот писател Јанг Хенџун е осуден на условна смртна казна од кинескиот суд, пет години откако беше уапсен и обвинет за шпионажа, објавија во понеделник светските агенции.
Јанг Хенџун беше приведен во Кина во 2019 година под сомнение дека ја загрозил националната безбедност. Кинеските власти подоцна го обвинија за шпионажа. Тогашниот премиер на Австралија, Скот Морисон, овие обвинувања ги нарече невистинити
Јанг, научник и романсиер кој пишуваше блог за кинеските работи, ги негира наводите против него, кои никогаш не беа објавени во јавноста.
Австралиската влада, која побара негово ослободување, е „згрозена од одлуката и ќе го пренесе својот најсилен одговор“ до Пекинг, рече министерката за надворешни работи Пени Вонг.
„Постојано повикуваме на основни стандарди за правда, процедурална правичност и хуман третман за д-р Јанг, во согласност со меѓународните норми и законските обврски на Кина. Нема да попуштиме во нашето застапување“, нагласи. Вонг објасни дека смртната казна ќе биде заменета со доживотен затвор доколку писателот не изврши сериозни кривични дела во рок од две години.
Како што забележува телевизијата ABC, кинескиот амбасадор во Канбера бил повикан во австралиското Министерство за надворешни работи на појаснување.
Јанг, кој претходно работел за кинеското Министерство за државна безбедност, во своите дела се залага за демократија, но често избегнува директна критика на владата во тие списи. 57-годишникот беше уапсен на аеродромот во Гуангжу во јануари 2019 година и обвинет за шпионажа. Неговиот случај оттогаш е главно зад затворени врати, вклучително и наводно тајно судење во 2021 година.
Австралиските власти честопати изразуваа загриженост за третманот на Јанг, но беа предупредени од кинеското Министерство за надворешни работи да не се мешаат во случајот и да го почитуваат судскиот суверенитет на нацијата. Додека бил во притвор, Јанг бил испрашуван повеќе од 300 пати и бил подложен на интензивна тортура шест месеци, соопшти неговото семејство.
