Трговците кои не ја намалиле цената на лебот од 450 гр на 33 денари, или ја намалиле цената но ја намалиле и грамажата на лебот, се санкционирани од ДПИ. Ова се само некои од прекршувањата кои се констатирани во последниве пет дена од страна на инспекторите кои спровеле 500 контроли и констатирале 6 прекршоци во висина од 750 илјади денари.

Иако беше кажано дека ќе се објават имињата на компаниите кои не ги почитувале мерките, такво нешто до сега не се случи.

Всушност дали се ова единствените прекршувања на мерките на територија на цела држава и дали се извршени контроли во сите економски субјекти?

Од Владата најавуваат дополнителни мерки и засилени контроли за зелените пазари, каде како што велат, се случува трговците да купуваат производи од маркетите по пониска цена како јајца на пример, и да ги продаваат на пазар, бидејќи како што велат, во земјава и регионот има дефицит од јајца. Ќе има контроли во маркетите и зелените пазари во цела држава за цените на овошјето и зеленчукот.