Зимскиот преоден рок во најсилните европски лиги заврши по полноќ. Точно 11 трансфери вредеа 30 милиони евра и повеќе, а највреден трансфер беше Џон Дуран кој за 77 милиони евра ја напушти Астон Вила и се пресели во Ал-Наср од Саудиска Арабија.
Манчестер Сити е клубот кој потроши најмногу оваа зима. Во сезона во која неговиот тим не блеска, Пеп Гвардиола реши да ги размрда работите со неколку нови имиња во тимот и направи четири од десетте најголеми трансфери оваа зима.
Англискиот шампион како нова напаѓачка опција го доведе Омар Мармуш од Ајнтрахт Франкфурт за 75 милиони евра, а во клубот додаде и двајца млади дефанзивци. 19-годишниот Витор Реис беше донесен од Палмеирас за 37 милиони евра, додека за една година постариот Абдукодир Хусанов, Ленс доби 40 милиони евра.
Во последниот ден од преодниот рок Манчестер Сити ја активира и откупната клаузула од 60 милиони евра за Нико Гонзалез, 23-годишниот шпански играч за врска од Порто.
- ТОП-10 ТРАНСФЕРИ ВО ТОП-ЛИГИТЕ:
1. Џон Дуран – од Астон Вила во Ал-Наср – 77.000.000 евра
2. Омар Мармуш – од Ајнтрахт во Ман. Сити – 75.000.000 евра
3. Квича Кварацкелија – од Наполи во ПСЖ – 70.000.000 евра
4. Нико Гонзалез – од Порто во Ман. Сити – 60.000.000 евра
5. Чави Симонс – од ПСЖ во РБ Лајпциг – 50.000.000 евра
6. Вандерсон Галено – од Порто во Ал-Ахли – 50.000.000 евра
7. Абукодир Хусанов – од Ленс во Ман. Сити – 40.000.000 евра
8. Виктор Реис – од Палмеирас во Ман. Сити – 37.000.000 евра
9. Луиз Енрике – од Ботафого во Зенит – 33.000.000 евра
10. Сантиаго Хименез – од Феенорд во Милан – 32.000.000 евра
