Женската тениска репрезентација на Словачка денеска се пласираше во полуфиналето на Купот Били Џин Кинг, откако на завршниот турнир во Малага ја совлада Австралија со 2:0.
Првиот бод на селекцијата на Словачка и го донесе 241-та светска тенисерка Викторија Хрунчакова (родена Кужмова), која ја победи 115-та тенисерка во светот Кимберли Бирел со 7:5, 6:7 (4), 6:3.
Словачка победи затоа што во вториот меч 43-та на ВТА-листата Ребека Шрамкова беше подобра од 85-та во светот Ајла Томљановиќ со 6:1, 6:2.
Во полуфиналето Словачка го чека победникот од мечот во кој се среќаваат Канада и Велика Британија. Канада ја брани титулата што ја освои минатата година во Купот Били Џин Кинг (поранешен ФЕД куп).
Претходно пласман во полуфиналето обезбедија селекциите на Полска и Италија.
