Мил-феј е традиционален француски десерт познат по своите слоеви од лиснато тесто и богат ванила крем. Името се преведува како „илјада лисја“, што го опишува тенкото и крцкаво тесто што се пече во многу слоеви. Денес, се служи во бројни варијации, често со додавање овошје, чоколадо или карамела, и се смета за еден од најпознатите класици на француската слаткарска традиција.
Потребно:
- 500 г лиснато тесто
- 500 мл полномасно млеко
- 4 жолчки од јајца
- 100 г шеќер
- 45 г густин
- 1 стапче ванила или 2 лажички екстракт
- 30 г путер
Подготовка: Избоцкајте го лиснатото тесто со вилушка, па печете го меѓу два плеха за печење 20-25 минути на 200 °C. Загрејте го млекото со ванилата. Изматете ги жолчките, шеќерот и густинот, додадете го топлото млеко и вратете на оган. Гответе додека не се згусне. Додадете го путерот. Покријте со фолија директно врз кремот и оладете. Изладете го печеното лиснато тесто и исечете го на три еднакви правоаголници. Редете во слоеви, кора – крем – кора – крем – кора. Оставете да се лади најмалку 4 часа.
