Неколку европски земји, вклучувајќи ги Велика Британија и Франција, се подготвени да испратат стотици војници во Украина како дел од мировниот договор по завршувањето на конфликтот, соопштија извори запознаени со планот.
Според „Блумберг“, мултинационалниот контингент во првата фаза би обезбедил поддршка на украинската армија преку обука и логистика, додека САД би придонеле со разузнавачка соработка, надзор на границите и испорака на оружје.
Сепак, европските претставници предупредуваат дека политичката и економската нестабилност во Лондон и Париз би можеле да го отежнат спроведувањето на планот.
Извори за весникот истакнуваат дека испраќањето британски и француски војници во Украина по завршувањето на конфликтот била тема на седницата на европските претставници одржана на 19 август.
Пакетот безбедносни гаранции за Украина што се подготвува предвидува мултинационална група европски војници, со Велика Британија и Франција како главни учесници, кои ќе обезбедат обука и засилување на украинските сили во првата фаза.
Дополнително, САД ќе го поддржат овој план со споделување разузнавачки информации, надзор на границите и испорака на системи за воздушна одбрана.
Британските власти се исто така подготвени да испратат војници во Украина како дел од „коалиција на оние што се подготвени“ за обезбедување воздушна и поморска одбрана, но не и за учество во директни борбени операции, објавува „Гардијан“.
Сепак, како што наведува „Политико“, повикувајќи се на неименуван европски дипломат, Европската Унија верува дека политичката слабост на раководството и тешката економска состојба во Велика Британија и Франција би можеле да го отежнат спроведувањето на овој безбедносен план.
Американската чизма нема да стапне на почвата на Украина…
Американскиот претседател изјави дека ја исклучува можноста за испраќање американски трупи во Украина, но дека САД би можеле да обезбедат воздушна поддршка.
Кога станува збор за безбедноста, Европа е подготвена да испрати луѓе на терен.
„Ние сме подготвени да им помогнеме веројатно од воздух“, рече Трамп во интервју за „Фокс енд Френдс“ на Фокс њуз.
Трамп призна дека рускиот претседател Владимир Путин можеби сепак не сака да склучи договор. „Ќе откриеме што се случува со претседателот Путин во следните неколку недели“, рече тој.
„Претседателот дефинитивно изјави дека американските чизми нема да влезат на терен во Украина, но секако можеме да помогнеме во координацијата и можеби да обезбедиме други средства за безбедносни гаранции за нашите европски сојузници“, изјави портпаролката на Белата куќа на прес-конференцијата.
