Ако сте љубител на рижото со пилешко, тоа ќе има лесен, летен вкус, доколку го освежите со малку лимон.
Ова е вистински егзотичен предлог за медитерански ручек.
Потребни состојки за 4 лица:
За рижото:
- 350g ориз
- 300g пилешко филе
- 3 лажици мед
- 2 лимонa
- 100g пармезан
- 50ml бело вино
- 4 гранчиња мајчина душица
- Малку маслиново масло
- 1 лажица путер
- Сол, бибер по вкус
За бујонот од зеленчук:
- 2l вода
- 1 корен од магдонос
- 1 кромид
- 2 моркова
- 1 чешне лук
Начин на подготовка:
- Исечете го пилешкото на мали парчиња.
- Исцедете го сокот од еден и пол лимон и ставете го во чаша. Другата половина од лимонот исечете ја на тенки резанки.
- Прво, подгответе го бујонот – сварете ги морковите, коренот од магдонос, кромидот и лукот во околу 2 литра вода. Гответе половина час, а потоа извадете го зеленчукот.
- Во меѓувреме, кратко пропржете го оризот на две лажици маслиново масло. Додадете го поголемиот дел од бујонот (да го прекрие оризот), плус 50ml бело вино.
- Додадете сол и бибер по вкус, а по потреба додавајте од зеленчуковиот бујон и варете додека оризот не стане речиси ал денте. Не го покривајте оризот додека се вари.
- Во меѓувреме, загрејте 5-6 лажици маслиново масло на силен оган, доволно за да го покрие дното на тавата.
- Додадете ги парчињата пилешко, листовите мајчина душица, сокот од лимон и парчињата лимон.
- Добро измешајте сè, па веднаш потоа, додадете го медот и постојано мешајте додека пилешкото не се карамелизира (околу 3-4 минути).
- Тргнете ја тавата со пилешкото од оган, па додадете го оризот. На крај, ставете го путерот, изрендајте го пармезанот и спојте ги сите состојки.
- Послужете го топло, по желба со изрендан пармезан одозгора.
