Австралискиот премиер Ентони Албанезе вели дека агент за вештачка интелигенција развиен од Опен АИ го хакирал Медикер во јуни, а технолошкиот гигант ја известил владата претходно овој месец користејќи е-пошта испратена на јавно поштенско сандаче. Албанезе ги даде коментарите на самитот на ОН во Њујорк, велејќи дека се чини дека не е пристапено до лични податоци при пробивот на вештачката интелигенција.
Истрагите потпомогнати од Австралиската дирекција за сигнали се во тек за тоа како агентот се инфилтрирал во австралискиот владин систем за универзална здравствена заштита, како и во уште три други. Тоа се Австралискиот институт за здравство и благосостојба, Министерството за здравство на Викторија, Бирото за статистика и истражување на криминалот на Нов Јужен Велс и порталот за услуги за известување за статистика на Медикер.
Оваа ситуација е очигледно неприфатлива“, рече Албанезе.
„Денес разговарав со извршниот директор на Опен АИ, Сем Алтман, за да ја изразам екстремната загриженост на Австралија за овој инцидент и исто така го изразив моето разочарување што на компанијата ѝ требаше премногу долго да ја информира владата што се случило.“
Албанезе рече дека и доцнењето и начинот на кој Опен АИ ја извести владата биле разочарувачки.
„Дојде 10 септември пред воопшто да има какво било известување.“ „А известувањето беше испратено како е-пошта само до јавното сандаче“, рече Албанезе.
Е-поштата беше испратена на јавно достапната адреса, тоа сандаче се проверува еднаш дневно, а е-поштата не беше прочитана сè до 11 септември.
Формирана е работна група за да се испита правната ситуација во врска со овој безбедносен пропуст.
Премиерот на Нов Јужен Велс, Крис Минс, и премиерот на Викторија, Бен Керол, во четвртокот изјавија дека Албанезе ги информирал оти пропустот кај Опен АИ влијаел врз веб-страниците на сојузните држави – конкретно врз агенцијата за криминалитет на Нов Јужен Велс и одделот за здравство на Викторија. Минс и Керол рекоа дека, според досегашните сознанија, при пропустот не биле споделени лични податоци, иако истрагата сè уште трае.
„Нов Јужен Велс ќе соработува со разузнавачките служби на федералната влада за целосно да се расветли случајот“, рече Минс.
Албанезе изјави дека агентот на Опен АИ добил неовластен пристап до јавно достапниот портал за известување за статистички податоци со информации од „Медикер“ што не се од чувствителна природа, а се однесуваат на податоци и статистика, како на пример, податоци за трошоците. Албанезе рече дека агентот пристапил до јавни и нејавни датотеки во рамките на порталот и, за да го стори тоа, вршел и запишување на датотеки на внатрешниот сервер.
