Се очекува британскиот премиер Кир Стармер денеска да го објави признавањето на палестинската држава од страна на Велика Британија во соопштение ,јавува Би-Би-Си.
Овој потег доаѓа откако премиерот во јули изјави дека Лондон ќе го промени својот став во септември доколку Израел не ги исполни условите, вклучително и согласувањето за прекин на огнот во Газа и посветеноста на долгорочен одржлив мировен договор што обезбедува решение за две држави.
Ова означува голема промена во британската надворешна политика, откако последователните влади изјавија дека признавањето треба да дојде како дел од мировниот процес и во време на максимално влијание.
Овој потег предизвика остри критики од израелската влада, семејствата на заложниците во Газа и некои конзервативци.
Израелскиот премиер Бенјамин Нетанјаху претходно изјави дека таков потег „наградува терор“.
Сепак, британските министри тврдат дека постои морална одговорност да се дејствува за да се зачува надежта за долгорочен мировен договор.
Владини извори изјавија дека ситуацијата на терен значително се влошила во последните недели, повикувајќи се на фотографии на кои се гледа глад и насилство во Газа, што премиерот претходно ги опиша како „неподносливи“.
Најновата копнена операција на Израел во Газа, која претставник на ОН ја опиша како „катастрофална“, принуди стотици илјади луѓе да избегаат.
Претседателот на Палестинската самоуправа, Махмуд Абас, го поздрави ветувањето на Велика Британија за признавање кога го посети Стармер претходно овој месец, а Даунинг стрит изјави дека двајцата лидери се согласиле дека Хамас нема да има никаква улога во идното управување со Палестина.
