Правниот тим на Бојан Јовановски-Боки 13 побарал термин за поднесување кривични пријави и почнување на кривично-правната операција, која ја нарекоа „Бумеранг“. Тие велат дека поради обемноста на материјалите што Боки13 ги поседува, побарани се повеќе термини. Напоменуваат дека квалитативната обработка на материјалот, доказите, ќе се врши исклучиво во присуство на подносителот Бојан Јовановски и на неговите полномошници, адвокатите“.

„Поради чувствителноста, карактерот и сериозноста на почнатиот процес со кодно име ‘Бумеранг’, апелираме до јавноста дека тој ќе се врши транспарентно во име на високиот степен на јавниот интерес. Гласно укажуваме до центрите на моќ, кои веројатно се директно засегнати од овој процес, да не вршат притисоци, да не упатуваат директни и индиректни закани и да престанат со незаконски дејства на уценувања и заплашувања со цел да го спречат и попречат почнатиот процес ‘Бумеранг’. Секако дека ваквите погоре опишани дејства од центрите на моќ беа очекувани за нас, но недвојбено истакнуваме дека ништо од сето тоа нема да ја спречи реализацијата на кривично-правната операција ‘Бумеранг’ и дека во одреден момент, доколку продолжи трендот на притисоци, закани, уцени, засегнатите страни ќе добијат соодветен одговор за своите незаконити дејства, кои интензивно и заткулисно се случуваат изминативе денови од кога јавно е објавено почнувањето на процесот“, посочува адвокатскиот тим на Боки 13.

Тие се обратија и до меѓународниот фактор.

„Го повикуваме и меѓународниот фактор во име на императивната заложба за владеење на правото и во име на фактот што во изминатите години токму од меѓународната заедница се вложени големи финансиски средства во нашата држава и правосудните институции за подобрување и прогрес на правото и правната држава, да го следат со внимание почнатиот процес и во рамките на своите надлежности да дадат свој позитивен придонес кон реализација на процесот. Јавноста ќе биде информирана за првиот термин и за другите усогласени термини за предавање на доказниот материјал и пријавите во ОЈО за ГОКК Скопје“, додаде адвокатскиот тим на Боки 13.