Босна слави! Италија не успеа да ја преживее Зеница и повторно не успеа да обезбеди пласман на Светско. Босанците ја победија четата на Џенаро Гатузо по подобро изведување на пенали, откако по 120 минути игра резултатот беше нерешен – 1:1.
Во најважниот дел, пеналите, Босанците погодија 4 од 4, а Италија не успеа да реализира преку Еспозито и Кристанте, со што им дозволи на момците на Сергеј Барбарез да приредат голема прослава за своите навивачи. Босна вечерва има причини за славје, откако Тахировиќ, Табаковиќ, Балајбеговиќ и Бајрактаревиќ го матираа Донарума за пат на Мундијал.
Чешка и вторпат по подобро изведување на пеналите слави, но овој пат победа која ги носи на ново Светско првенство. Во регуларниот дел во Прага вечерва беше 1:1, па во дополнителните 30 минути видовме нова драма, која заврши со по еден гол на двете страни. Напрво Крејчи ја доведе Чешка до 2:1, а нововлезениот Хог успеа да донесе ново израмнување за Данска на 2:2 во 111. минута.
Серијата пенали беше очајна за Данска. „Викинзите“ промашија дури три од четирите изведени пенали, што само и ја олесни работата на Чешка. Со погодокот на Садилек во четврттата серија Чешка дојде до 4:2 на пенали за пат на Мундијал.
Фудбалските репрезентации на Турција и Шведска пополнија две од последните четири европски места на Мундијалот ова лето. Во финалните бараж дуели вечерва, Турција славеше со 0:1 на гостувањтео во Приштина против Косово, додека Шведска во извонредно возбудлив меч во Стокхолм ја победи селекцијата на Полска со 3:2.
Косово одигра одличен меч со Туција. Домашните први се заканија преку Аслани, но на полувреме немаше голови. Моментот на вистината всушност беше 53. минута, кога по нафрлање на Кокчу, Актиркоглу успеа да ја внесе топката во мрежата на домашните за водство на Турција, што подоцна се покажа и доволно за виза за СП.
Шведска во Стокхолм дури трипати требаше да поведе за да победи. Еланга во 19. минута ги доведе домашните во водство од 1.0, по што Полска преку Залевски во 33. минута израмни на 1:1. Во завршницата на првиот дел домашните погодија уште еднаш, овој пат преку Лагербилке за 2:1. Во второто полувреме, Полјаците со голот на Свидерски повторно израмнија, сега на 2:2, но со голот на Виктор Ѓокереш во 88. минута, „викинзите“ заминаа на Мундијалот.
