Лица од Клиниката за онкологија во Скопје почнаа да се апсат. Од Основното јавно обвинителство Скопје кусо ни одговорија дека се преземаат активности по налог на јавен обвинител. Случајот Онкологија беше отворен откако медиумите во јавноста обелоденија дека се продаваат скапи лекови кои се наменети за пациенти болни од рак, но вработени ги продавале на црниот пазар. Акцијата ја започна поранешниот министер за внатрешни работи, Оливер Спасовски.
На Клиниката за онкологија каде што полицијата вршеше претрес приведен е Нино Васев поради сомнение за 7 кривични дела, дознава „Слободен печат“. Исто така, приведена е и секретарката на поранешниот економски директор. Полицијата, на Васев му го одзела и мобилниот телефон.
Акцијата е поврзана со повеќемесечната истрага на обвинителството за кражбата на цитостатици на Онкологија. Претреси утринава биле извршени кај осум лица. Одземени се телефони, компјутери, документација.
Според пишувањата на некои од медиумите три лица се избегани во странство додека траела предистрагата.
Од ОЈО Скопје беше отворена предистрага за овој случај.
Полицијата започна да врши и серија претреси на повеќе локации во објекти на лица за кои постојат сомненија дека се дел од аферата Диво месо, познат во јавноста како скандал онкологија.
Претресите се прават во домовите на лицата за кои постојат сомненија дека учестувале во злоупотребите на Клиниката за онкологија.
Станува збор за најголемата здравствена афера во која се вклучени вработени на клиниката за онкологија, кои наместо да ги лекуваат пациентите, им давале физиолошки раствори, а лековите ги препродавале на црниот пазар.
Во септември обвинителството отвори предистрага, која до ден денес нема никаков епилог.
