Никаде во светот работникот не работи толку многу работни часови. Ако законот се усвои тогаш ќе бидеме дел од друштвото на Мавританија и Египет кои имаат по 54 односно 53 работни часови, вели претседателот на Левица, Димитар Апасиев. Тврди дека партијата е подготвена да оди до крај, бидејќи, како што вели, законот ќе не врати во феудализмот.

Владата неодамна излезе со став дека поради недостаток на работна сила ќе мора да увезува работници од Бангладеш, Непал и Пакистан, наместо да ја унапреди положбата на работниците.

„Се поочигледно е дека законските измени на ЗРО и увозот на работна сила од странство е параван за обезбедување на работна сила за потребите на “Бехтел и Енка”, која плашејќи се од недостаток на работна сила под робовладетелски услови на домашниот пазар, побрза да ја уцени Владата со обезбедување на работна сила со увоз на работници од други држави.

Повеќе од јасно е дека сите отстапки и законски измени кои што оваа ненародна Влада ги прави за потребите на “Бехтел и Енка” не се за доброто на државата, народот и националните интереси, туку за сопствен бенефит и затоа Левица со сите сили ќе ги спречи овие закони“, се вели во соопштението на Левица испратено до медиумите.