Американската војска соопшти дека извршила „силен бран“ напади врз Иран, како одговор на обидите за напади со балистички ракети врз американските сили во вторникот, објави „Би-би-си“.
Централната команда на американската војска (ЦЕНТКОМ) соопшти дека погодила „десетици“ цели на Иранската револуционерна гарда, откако Иран истрела ракети кон американските бази во Јордан и нападна бродови во Ормускиот Теснец.
Иранските државни медиуми објавија дека во најновите напади на островот Кешм загинале тројца, меѓу кои и двегодишно дете. Погодени биле и други локации во јужниот и западниот дел на Иран.
Воената конфронтација меѓу САД и Иран, започната со американско-израелските напади во февруари, продолжува и по пет месеци, иако Доналд Трамп првично предвидуваше дека ќе трае само неколку недели. По краткото затишје и непотврдените обиди за обновување на дипломатските разговори, судирите повторно се разгореа.
Иран во вторникот нападна американска база и команден центар во Јордан, како и три нафтени танкери во Ормускиот Теснец. Трамп веднаш најави силна одмазда.
Американските удари, кои траеја околу еден час, биле насочени кон командни центри, ракетни и беспилотни капацитети, крајбрежна одбрана и поморска инфраструктура. Во Кешм, според иранските медиуми, била погодена семејна куќа, при што загинале родители и нивното двегодишно дете. Јордан соопшти дека соборил пет ирански ракети.
Напнатоста се прошири и во Ирак, каде во првите јавно потврдени заеднички американско-саудиски напади загинаа најмалку 20 припадници на Силите за народна мобилизација.
Багдад ги осуди нападите како повреда на суверенитетот, додека Трамп тврдеше дека биле координирани со ирачката влада.
Саудиска Арабија истовремено испрати порака дека сака деескалација.
Египет соопшти дека пожар во пристаниште бил предизвикан од напад со дрон, со што конфликтот дополнително се прошири низ регионот.
