Илјадници луѓе денес излегоа на улиците низ Австралија во знак на протест против посетата на израелскиот претседател Исак Херцог, за време на која тој ќе патува во неколку градови за да ја изрази својата солидарност со еврејската заедница во земјата, по нападот на плажата Бонди на 14 декември во кој загинаа 15 лица, што е најлошиот напад што ја погоди Австралија во последните децении, пренесува Еј-би-си њуз.
Сепак, посетата на израелскиот премиер предизвика реакции и од луѓе кои го сметаат за соучесник во смртта на цивилите во Појасот Газа, а низ целата земја се одржуваат демонстрации.
Во Сиднеј, илјадници луѓе се собраа на плоштад во централниот деловен округ на градот, каде што беа одржани говори и скандирани слогани во поддршка на Палестинците.
Полицијата употреби спреј со бибер и солзавец за да се обиде да ги потисне демонстрантите кои се обидоа да го пробијат полицискиот кордон и да го продолжат својот марш. Некои демонстранти беа уапсени по судирот со полицијата.
Претходно, полицијата ги повика демонстрантите да се соберат во централниот градски парк од причини поврзани со јавната безбедност, но организаторите на протестот изјавија дека планираат да се соберат во историското Градско собрание во Сиднеј.
Херцог им оддаде почит на жртвите
Илјадници членови на еврејската заедница, владини претставници и членови на опозициските партии го пречекаа Херцог на церемонија во чест на жртвите од нападот на плажата Бонди.
„Сите се сеќаваме на бојкотите, заканите, колегите што им го свртија грбот на своите еврејски пријатели (…) тоа беше прелудиум на Бодеј“, рече Херцог, обраќајќи се пред големата толпа собрана во Меѓународниот конгресен центар во Сиднеј.
„Ова беше напад врз сите Австралијанци. Тие ги нападнаа вредностите што нашите демократии ги сметаат за фундаментални: светоста на човечкиот живот, верската толеранција, толеранцијата, достоинството и почитта“, рече Херцог во изјавите од местото на нападот.
Во соопштението, заменик-шефот на Извршниот совет на австралиските Евреи (ECAJ), Алекс Ривкин, рече дека посетата на Херцог „ќе го зајакне моралот на заедницата што страда“.
Еврејскиот совет на Австралија, кој е многу критичен кон израелската влада, денес објави отворено писмо потпишано од повеќе од 1.000 еврејски австралиски академици и други личности, во кое се повикува Албанезе да ја повлече поканата до Херцог.
