Австралиското тело за заштита на безбедноста на интернетот минатиот четврток се закани дека ќе го казни Твитер поради неуспехот да се справи со злоупотребата на интернет и рече дека има пораст на „токсичноста и омразата“ откако Илон Маск го купи Твитер.

Комесарката за е-безбедност, Џули Инман Грант, поранешна вработена во Твитер, рече дека платформата сега е одговорна за една од три онлајн жалби за говор на омраза пријавени во Австралија.

Инман Грант рече дека Твитер има 28 дена да покаже дека е сериозен во решавањето на проблемот или ќе се соочи со казна од 700.000 австралиски долари за секој ден кога ќе го пропушти крајниот рок.

Таа рече дека Твитер мора да спроведе серија конкретни чекори кои покажуваат „што прави за да спречи онлајн омраза на својата платформа и да ги спроведе сопствените правила“.

– Ни треба одговорност на тие платформи и акција за заштита на нивните корисници, рече таа.

– Не можете да имате одговорност без транспарентност, а тоа е она што сакаат да го постигнат ваквите правни дејствија, додаде таа.

Откако ја купи платформата во октомври 2022 година, Маск отпушти повеќе од 80 отсто од својата глобална работна сила, вклучително и многу од модераторите на содржината одговорни за спречување злоупотреба.

Во ноември, Маск објави широка амнестија која им овозможи на десетици илјади суспендирани или забранети сметки да се вратат на платформата.

Се чини дека Твитер пропушти можност да се бори против говорот на омраза, рече Инман Грант, која работеше на сајбер безбедноста во компанијата по 17 години во Мајкрософт.